ପ୍ରେମିକାର ଲାପଟପ ପଡିଥିଲା ବନ୍ଧା, ମୁକୁଳାଇବା ପାଇଁ ଲୁଟ କଲା ପ୍ରେମିକ

କୋଚିଂ ସିଟି କୋଟାରେ ଜଣେ ପ୍ରେମିକ ତାଙ୍କ ପ୍ରେମିକାଙ୍କୁ ଖୁସି କରିବା ପାଇଁ ଗୋଟିଏ ପରେ ଗୋଟିଏ ତିନୋଟି ଡକାୟତି କରି ପୁଲିସର ନିଦ ଉଡ଼ାଇ ଦେଇଥିଲେ । ଏହି ପାଗଳ ପ୍ରେମିକ ଏଥିପାଇଁ ଡକାୟତି କରିଥିଲେ ଯାହା ଦ୍ୱାରା ସେ ଟଙ୍କା ଯୋଗାଡ କରିପାରିବେ ଏବଂ ବନ୍ଧକ ଥିବା ପ୍ରେମିକାର ଲାପଟପକୁ ମୁକୁଳାଇ ପାରିବେ | ଏଥିପାଇଁ ଯୁବକ ଜଣକ ତାଙ୍କ ସାଙ୍ଗ ସହିତ ଡେଲିଭରି ବୟ , ପେଟ୍ରୋଲ ପମ୍ପ କର୍ମଚାରୀ ଏବଂ ପନିପରିବା ବିକ୍ରେତାଙ୍କୁ ଛୁରୀ ଦେଖାଇ ଲୁଟି ନେଇଥିଲେ। ଗୋଟିଏ ଦିନରେ ଲଗାତାର ତିନିଟି ଡକାୟତି ଘଟଣା ଯୋଗୁଁ ପୁଲିସର ନିଦ ଉଡିଯାଇଥିଲା | ଆଉ ପୁଲିସ ସ୍ୱତନ୍ତ୍ର ଟିମ ଗଠନ କରି ଶେଷରେ ଅଭିଯୁକ୍ତ ପ୍ରେମିକ ଓ ତାଙ୍କ ସାଙ୍ଗକୁ ଗିରଫ କରିଛି | କୋଟା ନଗର ପୁଲିସ ଅଧୀକ୍ଷକ କେସର ସିଂ ଶେଖାୱତ ଏହି ଘଟଣାର ଖୁଲାସା କରିଛନ୍ତି।

ସେ କହିଛନ୍ତି ଯେ ଗିରଫ ଅଭିଯୁକ୍ତଙ୍କ ମଧ୍ୟରେ ବିକାଶ ୱାନୱାନି ଏବଂ ତାଙ୍କ ବନ୍ଧୁ ମୋହିତ ଅଛନ୍ତି। ବିକାଶ ତାଙ୍କ ପ୍ରେମିକାଙ୍କ ବନ୍ଧକ ଲାପଟପକୁ ମୁକୁଳାଇବା ପାଇଁ ସହରରେ ଏକ ଡକାୟତି ଯୋଜନା କରିଥିଲା। ସେ ତାଙ୍କ ସହଯୋଗୀ ମୋହିତଙ୍କ ସହ ରବିବାର ଦିନ ଛୁରୀ ଦେଖାଇ ଗୋଟିଏ ପରେ ଗୋଟିଏ ଡକାୟତି କରିଥିଲେ । ପୁଲିସ ଅଧୀକ୍ଷକ କହିଛନ୍ତି ଯେ ଏହି ଦୁଇ ଜଣ ଡେଲିଭରି ବୟ, ପେଟ୍ରୋଲ ପମ୍ପ କର୍ମଚାରୀ ଏବଂ ପନିପରିବା ବିକ୍ରେତାଙ୍କୁ ଲୁଟିଥିଲେ | ଏହା ଉପରେ ପୁଲିସ ତୁରନ୍ତ ଟିମ ଗଠନ କରି ଅଭିଯୁକ୍ତକୁ ଧରିବା ପାଇଁ ରଣନୀତି କରିଥିଲା। ସହରର ୨୨ଟି ସ୍ଥାନରେ ପୁଲିସ ଅବରୋଧ କରି ଏମାନଙ୍କୁ ଧରିଥିଲା |